Azadsöz.az xəbər verir ki, bu gün “Bizim Cəbiş müəllim” filminin Makedonu Aqil Ağacanovun doğum günüdür. Aqil Ağacanov 22 avqust 1949-cu ildə Bakının Sabunçu rayonunun Pirşağı kəndində anadan olub.Bakı şəhəri 112 saylı orta məktəbi 8 illik sistemlə bitirib, daha sonra gecə məktəbində Ramana müəllimlərindən təhsil alıb. Orta təhsilini bitirdikdən sonra 1969-cu ildə hərbi xidmətə yola düşüb.Uzun müddət aşpaz, xüsusilə də kababçı kimi fəaliyyət göstərib.Bakı kəndlərində onu kababçı Aqil kimi tanıyırlar.
Aqil Ağacanovun oynadığı Makedon rolu “Bizim Cəbiş müəllim” filmindəki maraqlı obrazlardan biridir. Onu filmə təsadüfən çəkirlər. Belə ki, Aqillə bulvarda təsadüfən nərd oynayan rejissor Həsən Seyidbəyli nərddə uduzduqdan sonra sözünü tutaraq onu Makedon roluna sınaqlara çağırır.Çünki oyuna başlamazdan öncə Aqil Ağacanov Həsən Seyidbəyli ilə mərc kəsir ki, əgər rejissor uduzsa, onu kinoya çəkəcək. Belə də olur.
Makedon rolunun ifaçısı Aqil Ağacanov hazırda Pirşağı kəndində yaşayır. Deyirlər rejissor filmin çəkilişləri zamanı Aqilin bəzi kaprizlərinə dözməli olub. Məsələn, Tanya ilə öpüş səhnəsində Makedon – Aqil Ağacanov özü qəsdən səhvlərə yol verirmiş ki, dubl təkrarlansın.Bunu Aqil Ağacanovun özü çox sonralar etiraf edibmiş.
