Azadsöz.az xəbər verir ki, 19 may 2023-cü il tarixində Göyçay Dövlət Aqrar İnkişaf Mərkəzinin inzibati binasında qarşıdan gələn taxıl biçininə hazırlıqla əlaqədar görüş keçirilib.
Görüşdə Göyçay Dövlət Aqrar İnkişaf Mərkəzinin rəhbəri Elçin İsmayılov və mərkəzin əməkdaşları, “Aqroservis” ASC-nin Yevlax regional nümayəndəliyinin Göyçay rayonu üzrə rəhbəri Arzu Hacıyev, Göyçay Rayon Kənd Təsərrüfatı İdarəsinin Bitkiçilik sektoru, Texniki nəzarət Xidməti və kombayn sürücüləri iştirak ediblər.
Tədbirdə çıxış edən Mərkəzin direktoru Elçin İsmayılov biçin mövsümü ərzində sahələrdə yanğın təhlükəsizliyinə ciddi əməl olunması üçün müvafiq tədbirlərin həyata keçirilməsini vurğulayıb.Bütün ərazilərdə biçin müvafiq texniki normalara uyğun aparılmalı və yanğın təhlükəsizliyi ilə bağlı qabaqlayıcı tədbirlər görülməsini diqqətə çatdırıb.Bildirib ki, bu məsələlərlə bağlı torpaq mülkiyyətçiləri maarifləndirilməli və biçini aparan texniki heyət ehtiyatlı davranmalıdır. Yanğın təhlükəsizliyi, həmçinin taxılın tez və itkisiz yığılıb daşınması üçün lazım olan bütün tədbirlər həyata keçirilməlidir.
Daha sonra tədbirdə taxıl biçini ilə əlaqədar qarşıya çıxa biləcək məsələlər və həllinə dair təkliflər müzakirə edilib, müraciətlər dinlənilib və müvafiq tapşırıqlar verilib.
Görüşün sonunda Texniki nəzarət Xidmətinin və kombayn sürücülərinin təsdiq olunmuş müqavilə sənədlərinə baxılıb, həmçinin kombayınçılarla birgə kombaynlar nəzərdən keçirilərək taxıl biçininə hazır olduğu təsdiq olunub.
