Azadsöz.az xəbər verir ki, 11 avqustda Göyçay rayon İcra Hakimiyyətinin başçısı səlahiyyətlərini müvəqqəti icra edən İkram Vəliyevin növbəti səyyar qəbulu qrafikə uyğun olaraq Müskürlü kənd İnzibati Ərazi Dairəsi üzrə Nümayəndəliyin Qəbələ Müskürlü kəndində keçirildi.RİH başçısı aparatının məsul şəxsləri, idarə, müəssisə, təşkilat rəhbərləri və kənd sakinləri iştirak ediblər.
Qəbulda əvvəl İkinci Qarabağ müharibəsində şəhidlik zirvəsinə ucalan Təbriz Məhəmmədəli oğlu Xancanovun əziz xatirəsi ehtiramla yad olunaraq, məzarı üzərinə gül dəstələri düzülüb, ruhuna dualar oxunub.
Daha sonra keçirilən görüşdən öncə Birinci və İkinci Qarabağ müharibəsində torpaqlarımızın suverenliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Rayon İcra Hakimiyyətinin başçısı səlahiyyətlərini müvəqqəti icra edən İkram Vəliyev qəbulda çıxış edərək 44 günlük Vətən müharibəsi zamananı Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlarından söz açıb.Qəbələ Müskürlü kəndinin eləcə də rayonun sosial-iqtisadi inkişafı, əhalini narahat edən problemlərin həlli istiqamətində həyata keçirilən tədbirlərdən görülən və həmçinin görüləcək işlərdən danışıb. Diqqətə çatdırıb ki, Prezident İlham Əliyevin tapşırıqlarına əsasən əhali ilə mütamadi olaraq keçirilən səyyar görüşlərin əsas məqsədi sakinlərə daha yaxın olmaq, onları narahat edən məsələləri öyrənmək və həlli istiqamətində işləri həyata keçirmək lazım olduğunu vurğulayıb.
Qəbulda kənd sakinləri arxların qazılması, internet, gediş-gəliş üçün kəndə avtobusun verilməsi, istifadə müddətini başa vurmuş transformatorun yenisi ilə əvəz olunması üçün rəy və təkliflərini veriblər.
Vətəndaşların müraciətlərində qaldırılan məsələlərin bir qisminin həllinə yerindəcə köməklik göstərilib, araşdırılmasına ehtiyac olan digər məsələlərin həlli aidyyəti üzrə müəssisə və təşkilat rəhbərlərinə tapşırılaraq nəzarətə götürülüb.
Səyyar qəbuldan məmnun qalan sakinlər onlara yaradılan belə şəraitə, insanların problemlərinin həlli istiqamətində həyata keçirilən işlərə görə Prezident İlham Əliyevə və Birinci Vitse Prezident Mehriban xanım Əliyevaya minnətdarlıqlarını ifadə ediblər.
