Azadsöz.az xəbər verir ki, ötən gün sosial şəbəkələrdə Göyçay rayonunun Cəyirli kənd ərazisində natəmizliklə bağlı vətəndaşların paylaşdığı çıxış videosu bu gün öz müsbət həllini tapıb.
Rayon İcra Hakimiyyəti başçısının Cəyirli kənd inzibati ərazi dairəsi üzrə nümayəndəsi Vüsal Abbasov və bələdiyyə sədri tərəfindən əraziyə xüsusi texnika cəlb olunaraq sözügedən ərazi məişət tullantılarından, daş və digər tullantı parçalarından, plastik qablardan, polietilen torbalardan təmizlənib və təmizlik maşınına yığılaraq ərazidən daşınıb.
Vüsal Abbasov saytımıza açıqlama verərək bildirib ki, “Qeyd olunan həmin ərazi dəfələrlə bizim tərəfdən təmizlənməyinə baxmayaraq yenidən məişət tullantıları ora atılır.Heç kim kənardan gəlib ora zibil atmır elə həmin yeri natəmiz edən kəndin bəzi vətəndaşlarıdır”.
İnanırıq ki, görülmüş bu təmizlik işindən sonra yenidən xoşagəlməz mənzərə yaranmayacaq.Unutmayaq ki, ekoloji tarazlığın qorunması, eyni zamanda təbiətə qayğı hissinin güclənməsi istiqamətində çalışmaq hər birimizin vətəndaş borcudur.
