Azadsöz.az xəbər verir ki, 22 iyul 2023-cü il tarixdə Milli Mətbuat və Jurnalistika Günü münasibətilə bir qrup media nümayəndələrinin iştirakı ilə görüş keçirilib.
Görüşdə Azadsöz.az xəbər saytının təsisçisi və baş redaktoru Səbuhi Eltonlu, Xırdalan informasiya saytının baş redaktoru Anar Nağıyev, AJB-nin və AYB-nin üzvü, tarixçi, prezident təqaüdçüsü Aqil Kəngərli, “Həftəlik Azərbaycan” Media Qrupunun rəhbəri Aqil Mahmudov, mədəniyyət işçisi, operator Arif Heydərov, jurnalistlər- Günel İsayeva, Şahnəzər Bəşirov, Rəşad Rəşidov, Samir Cəbiyev, Şəhid Ailələrinə “Qayğı” Cəmiyyətinin Göyçay rayon şöbəsinin rəhbəri Eldəniz Rüstəmov, şəhid ataları Akif Kərimov, Ərəstun Əliyev, İlyas Nadirov, Əkbər Qaçayev, Gənclərin İnkişaf və Karyera Mərkəzinin Göyçay nümayəndəliyinin rəhbəri Çoşqun İsmayılov iştirak ediblər.
Görüş iştirakçıları ilk olaraq Göyçay Şəhidlər Xiyabanını ziyarət edərək Azərbaycanın müstəqilliyi və ərazi bütövlüyü uğrunda canlarından keçmiş şəhidlərin müqəddəs xatirəsini dərin ehtiramla yad edib, məzarları önünə gül-çiçək dəstələri düzüblər.Şəhidlərin xatirəsi bir dəqiqəlik sükutla yad edilib, onların ruhuna dualar oxunub.
Daha sonra mərasim çay süfrəsi arxasında davam edib, peşə bayramı münasibətilə tort kəsilib, təbriklər səsləndirilib.Görüşdə çıxış edənlər bildiriblər ki, bu gün Azərbaycan Milli Mətbuatının yaranmasından 148 il ötür. Əsası Həsən bəy Zərdabi tərəfindən qoyulmuş 22 iyul 1875-ci ildə işıq üzü görmüş “Əkinçi” qəzetinin nəşrə başladığı tarix Azərbaycanda Milli Mətbuat Günü kimi qeyd olunur.Mətbuatımız mütərəqqi ənənələri formalaşdıraraq cəmiyyət qarşısında üzərinə götürdüyü missiyanı layiqincə yerinə yetirib.Müstəqilliyin əldə edilməsindən sonra informasiya texnologiyalarının inkişafı Azərbaycan mətbuatını qlobal informasiya şəbəkəsinin bir hissəsinə çevirib. Azərbaycan xalqının Ümummilli Lideri, Ulu Öndər Heydər Əliyevin 1998-ci il 16 avqust tarixli “Azərbaycan Respublikasında söz, düşüncə vəinformasiya azadlığının təmin edilməsi tədbirləri haqqında” fərmanı ilə ölkədə kütləvi informasiya vasitələri üzərində senzuranın ləğv edilməsi kütləvi infromasiya vasitələrinin sürətli inkişafına ciddi təkan verdi.
Sonra görüş “Bizim bağ” restoranında davam etdirilib.
Sonda Şəhid Ailələrinə “Qayğı” Cəmiyyətinin Göyçay rayon şöbəsinin rəhbəri Eldəniz Rüstəmov tərəfindən 12 nəfər jurnalist peşəkar fəaliyyətinə görə 22 iyul-Milli Mətbuat və Jurnalistika Günü münasibətilə “Fəxri Fərman”la təltif edilib.
