Azadsöz.az xəbər verir ki, 7 mart 2023-cü il tarixində Göyçaylı şəhid valideynləri Sumqayıtda Milli Qəhrəman Polad Həşimovun evini ziyarət edib.
Görüşdə 2016-cı il aprel döyüşlərində torpaqlarımızın ərazi bütövlüyü uğrunda gedən döyüşlərdə şəhidlik zirvəsinə ucalan Teymur Qasımovun atası Mikayıl Qasımov , 44 günlük Vətən Müharibəsində şəhid olan Vasif Əlibala oğlu Məmmədovun anası Zenfira Məmmədova və “Şirvanın səsi” və “Dövlət” informasiya agentliyinin əməkdaşı Gülşən Muradova iştirak edib.
Çay süfrəsi arxasında keçən görüşdə Milli Qəhrəman Polad Həşimovun anası Səmayə Həşimova oğlu haqqında danışaraq onun Tovuz döyüşlərində göstərdiyi şücaətindən söhbət açıb. 44 günlük Vətən müharibəsində qüdrətli Azərbaycan Ordusunun qazandığı tarixi qələbədə xalqın əzmkarlığını, birliyini qeyd edib. Bu gün şəhidlərimizlə, qazilərimizlə hər birimizin fəxr etdiyini, Azərbaycan xalqı var olduqca şəhidlərimizin də unudulmayacağını vurğulayıb.
Daha sonra şəhid atası Mikayıl Qasımov, şəhid anası Zenfira Məmmədova övladlarının qısa və şərəfli ömür yolundan danışıb, şəhidlərimizlə bağlı xatirələrini bölüşüblər.
Görüşün sonunda şəhid valideynləri və Gülşən Muradova Milli Qəhrəmanımızın şəkillərindən, həmçinin ona məxsus olan əşyalardan ibarət guşə ilə tanış olublar.
