Azadsöz.az xəbər verir ki, noyabrın 17-də 44 günlük Vətən müharibəsində qəhrəmancasına şəhid olmuş Göyçay rayon sakini Həsənov Maarif Rahim oğlu və Yenikənd kənd sakini Kərimli Azad Elşad oğlunun ikinci ildönümü məzarı önündə qeyd edildi.
Tədbirdə rayon İcra Hakimiyyəti başçısının birinci müavini İkram Vəliyev , rayon İcra hakimiyyəti başçısı aparatının nümayəndələri, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Pərviz Feyzullayev, Göyçay rayon Polis şöbəsinin rəisi Müqalib Abdıyev, Şəhid Ailələrinə “Qayğı” Cəmiyyətinin Göyçay rayon şöbəsinin rəhbəri Eldəniz Rüstəmov, idarə, müəssisə və təşkilatların rəhbərləri, qazilər, Vətən müharibəsi iştirakçıları, dindarlar, şəhid ailələri və şəhidlərin ailə üzvləri iştirak edirdilər.
Əvvəlcə şəhidlərin əziz xatirəsi ehtiramla yad olunub, məzarları üzərinə gül dəstələri düzülüb.
Mərasimdə rayon İcra Hakimiyyəti başçısının birinci müavini İkram Vəliyev çıxış edərək şəhidimizə Allahdan rəhmət, ailəsinə səbir diləyib.Bildirib ki, 2020-ci ilin 27 sentyabrında başlayan və Azərbaycanın ən yeni tarixinin şanlı səhifələrindən olan Vətən müharibəsi xalqımızın yaddaşına qızıl hərflərlə yazıldı. Müzəffər Ali Baş Komandan, Prezident İlham Əliyevin rəhbərliyi ilə Azərbaycan Silahlı Qüvvələrinin 44 gün ərzində göstərdiyi misilsiz şücaət və qəhrəmanlıq, xüsusilə də Şuşanın əfsanəvi azadedilmə əməliyyatı dünyanın diqqətini ölkəmizə yönəltdi.Azərbaycan xalqının 30 illik Vətən həsrətinə, yurd, el-oba niskilinə 44 gündə son qoyulduğunu bildirən İ.Vəliyev şəhidlik zirvəsinə ucalanların xatirəsini yaşatmaq, onları gəncliyə nümunə göstərmək bizim mənəvi borcumuz olduğunu vurğulayıb.
Daha sonra digər natiqlər çıxış edərək şəhidlərin qısa və şərəfli həyat yolundan bəhs ediblər.Prezident, Ali Baş Komandan İlham Əliyevin rəhbərliyi ilə başa çatan Qələbənin tarixi əhəmiyyətindən danışıblar. Ordumuzun gücü, birliyimiz və həmrəyliyimiz sayəsində əldə olunan tarixi Qələbədə Azərbaycanın hansı mərhələlərdən keçdiyini diqqətə çatdırıblar.
Məktəblilər vətənpərvərlik mövzusunda şeirlər səsləndiriblər.
Şəhidlərimizin adına ehsan süfrəsi verilib.
Şəhidlərin ailə üzvləri göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.