Azadsöz.az xəbər verir ki, Göyçay Rayon İcra Hakimiyyətinin, Göyçay rayon Gənclər və İdman İdarəsinin birgə təşkilatçılığı ilə Gənclər Evində “2 fevral – Gənclər günü” münasibətilə “Gəncliyin bir günü” mövzusunda bayram tədbiri keçirilib.
Tədbirdə rayon icra hakimiyyəti başçısının müavini, ictimai-siyasi və humanitar məsələlər şöbəsinin müdiri Zivər Zeynalova,İcra aparatının məsul şəxsləri, Göyçay rayon Gənclər və İdman İdarəsinin, Gənclər Evinin kollektivi, Gənclərin İnkişaf və Karyera Mərkəzinin Göyçay nümayəndəliyinin rəhbəri Coşqun İsmayılov, rayon Mədəniyyət Mərkəzinin əməkdaşları, məktəblilər, qazilər, Azadsöz.az saytının, AzadSözAz TV-nin əməkdaşları və rayon gəncləri iştirak ediblər.
Əvvəlcə tədbir iştirakçıları ümummilli lider Heydər Əliyevin Göyçay şəhərinin mərkəzində ucaldılmış abidəsini ziyarət edib, abidə önünə gül-çiçək dəstələri düzərək xatirəsini dərin ehtiramla yad ediblər.
Gənclər Evinin foyesində gənclərin əl işlərindən ibarət sərgi nümayiş edilib.
Bayram tədbiri Azərbaycan Respublikasının Dövlət Himninin səsləndirilməsi, Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Zivər Zeynalova bu əlamətdar tarixi gün münasibətilə gəncləri təbrik edib. Azərbaycanda dövlət gənclər siyasətinin formalaşmasında ümummilli lider Heydər Əliyevin adı ilə bağlı olduğunu, Ulu Öndərin respublikamıza rəhbərliyinin bütün dövrlərində sağlam gəncliyin, bu dövlətə sahib dura biləcək, onu inkişaf etdirəcək bir nəslin yetişməsinə çalışdığını vurğulayıb. Heydər Əliyevin 1997-ci il fevralın 2-də imzaladığı Fərmana əsasən, fevralın 2-si Azərbaycan Gəncləri Günü kimi elan edildiyini diqqətə çatdırıb. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq Azərbaycanda təntənəli şəkildə qeyd edilməyə başlanılmasını qeyd edib.
Daha sonra gənc könüllər arasında intellektual bilik yarışı keçirilib, qalib komandalar müəyyən edilərək mükafatlandırlıb.
Sonra Mədəniyyət Mərkəzinin əməkdaşlarının, balaca fidanların ifasında musiqi parçaları və rəqs nömrələri təqdim olunub.
Sonda rayonun ictimai-siyasi həyatında yaradıcılığı və yüksək fəallığı ilə seçilən bir qrup gəncə rayon İcra Hakimiyyətinin diplomları təqdim edilib.