Azadsöz.az xəbər verir ki, 8 iyul 2023-cü il tarixdə saat 10:00-da Göyçay şəhər Rəsul Rza ev muzeyində gənc rəssamlar Rahim İbrahimov və Yunis Həmidovun əsərlərindən ibarət “Duyğuların rəngi” adlı rəsm sərgisinin açılış mərasimi təşkil olunub.
Sərgidə Göyçay şəhər Rəsul Rza ev muzeyinin direktoru Solmaz Həsənova başda olmaqla muzeyin kollektivi, AJB və AYB-nin üzvü, tarixçi, prezident təqaüdçüsü Aqil Kəngərli, rəssam-pedaqoq Ehtiram Kərimov və şagirdləri, gənc şair Əli Munis, Azadsöz.az xəbər saytının təsisçisi və baş redaktoru Səbuhi Eltonlu, saytın xüsusi müxbiri Gülşən Muradova, müxbir Zəka Nağıyev, gənc rəssam Məhəbbət Kazımova və ictimaiyyət nümayəndələri iştirak ediblər.
Tədbiri giriş sözü ilə açan muzeyin bələdçisi Gülnar Ağayeva gənc rəssamları sərgi münasibətilə təbrik edib, sərgi ilə bağlı ətraflı məlumat verib və onlara gələcək fəaliyyətlərində uğurlar arzulayıb.Rəssamların əl işlərinin mükəmməllik nümunəsi olduğunu, rəssamlıq sənətini öyrənən gənclər üçün əsl məktəb sayıldığını diqqətə çatdırıb.
Daha sonra sərgidə çıxış edən rəssam-pedaqoq Ehtiram Kərimov öz növbəsində tələbələrini təbrik edərək, rəssamlıq sənətinə böyük maraq göstərdiklərini diqqətə çatdırıb. Düşüncələrindən süzülən duyğularını ecazkar rənglərin köməyi ilə ağ kətan üzərinə həkk etməyə nail olduqlarını qeyd edib.
Sonra tədbirdə AYB-nin üzvü, tarixçi, prezident təqaüdçüsü Aqil Kəngərli, gənc şair Əli Munis və digərləri çıxış edərək, gənc rəssamları sərgi ilə bağlı təbrik ediblər.İstedadlı gənclərin daha da böyük uğurlara imza atmaqları üçün belə tədbirlərin keçirilməsinin qaçılmaz olduğunu bildiriblər.
Gənc rəssamlar yaradılmış şəraitə görə, muzeyin direktoru Solmaz Həsənovaya minnətdarlıqlarını bildirərək, nümayiş edilən sənət əsərləri ilə bağlı təəssüratlarını bölüşüblər.
Rəsmi hissədən sonra qonaqlar gənc rəssamların əl işlərindən ibarət sərgiyə baxış keçiriblər.
Qeyd edək ki, sərgi iyulun 15-dək davam edəcək.
Xatırladaq ki, sərginin informasiya dəstəyi Azadsöz.az xəbər saytına məxsusdur.
Səbuhi Eltonlu
Gülşən Muradova
Zəka Nağıyev
