Azadsöz.az xəbər verir ki, bu gün gecə saatlarından başlayaraq Göyçayda yağan intensiv yağış hal-hazırda da yağmaqda davam edir. Bu yağışlı hava şəraitində Göyçay Rayon İcra Hakimiyyəti yanında Şəhər Təsərrüfatı Birliyinin Sanitar-Təmizlik Şöbəsinin təmizlik işçiləri səhər saatlarından başlayaraq rayonun prospekt və küçələrində yaranan müəyyən problemləri aradan qaldırmağa çalışırlar.
Belə ki, rayonun Heydər Əliyev prospektindən keçən kiçik bərələrə bəzi məsuliyyətsiz sakinlərimiz tərəfindən atılan şüşə, plastik butulkalar, polietilen torbalar və məişət tullantıları təmizlik işçiləri tərəfindən bərələrdən təmizlənərək suyun axını tənzimlənib.
Bununla yanaşı hal-hazırda rayon daxilində mövcud olan kiçik bərələr, arxlar və kanalizasiyalar yağan yağış sularından yaranacaq problemlərin qarşısının alınması üçün təmizlik işçiləri tərəfindən qabaqlayıcı tədbirlər görülür.