Azadsöz.az xəbər verir ki, Ağdaş Regional Mədəniyyət İdarəsinin tabeliyində fəaliyyət göstərən Göyçay Tarix-Diyarşünaslıq Muzeyi 25 yanvar 2023-cü il tarixdən “Keçmişə foto şəkillərin gözü ilə” adlı layihəyə start verib.
Layihənin məqsədi muzey fondunda saxlanılan fotoları silsilə şəklində üzə çıxarmaq və onlayn nümayiş etdirməkdir.
İlk nümayiş hörmət və ehtiramla yad edilən Sabir Soltanova həsr olunub.
S.Soltanov 1936-cı ildə anadan olub.1965-ci ildə Azərbaycan Dövlət İncəsənət İnstitutunun Mədəni-maarif fakultəsini bitirdikdən sonra Sumqayıt şəhər 7 saylı Texniki-peşə məktəbində tərbiyəçi, “İnşaatçılar” Mədəniyyət evində şöbə müdiri, 1968-ci ildən həmin Mədəniyyət evinin direktoru təyin edilmişdir.
1969-cu ildən isə Göyçay rayon Mədəniyyət evinə direktor təyin edilmiş Sabir Soltanov 1980-cı ildən 1985-ci ilə kimi Göyçay Mədəniyyət şöbəsinin müdiri işləmişdir. 1989-cu ildən yenidən Göyçay Mədəniyyət evinin direktoru vəzifəsini icra etmişdir. S.Soltanov 2003-cü ilin mart ayında dünyasını dəyişmişdir.
Qeyd edək ki, S.Soltanovun GTDM-nin ərsəyə gəlməsində və qədim eksponatlarla zənginləşməsində əvəz olunmaz xidmətləri olmuşdur.
