Azadsöz.az xəbər verir ki, bu gün Birinci Qarabağ qəhrəmanlıq göstərərək şəhidlik zirvəsinə ucalan Fuad Məmmədovun anım günüdür.Fuad Məmməd oğlu Məmmədov 1974-cü ildə Göyçay rayonunun Yeniarx kəndində anadan olub. Orta təhsilini səkkizinci sinfinə kimi rayonun Xəlitli kəndində başa vuran şəhidimiz 1990-cı ildə təhsilini 58 saylı Texniki Peşə Məktəbində açılmış ticarət kursunda davam etdirib.
O, 1992-ci il iyulun 22-də Səfərbərlik və Hərbi Xidmətə Çağırış üzrə Dövlət Xidmətinin Göyçay rayon şöbəsi tərəfindən həqiqi hərbi xidmətə çağırılıb.Xidmətini Daxili Qoşunların 17072 saylı hərbi hissəsində keçib.Daha sonra Tərtər bölgəsinə ezam olunub.Xidmət etdiyi ilk günlərdən ağır döyüşlərdə iştirak edib.
Fuad Məmmədov 1992-ci il noyabrın 15 – də Ağdərə rayonunun Çıldıran kəndi uğrunda gedən döyüşlərdə düşmən gülləsinə tuş gələrək, şəhidlik zirvəsinə ucalıb.Göyçay Şəhidlər Xiyabanında dəfn olunub.