Azadsöz.az xəbər verir ki, 12 iyulda torpaqlarımızın azadlığı uğrunda gedən döyüşlərdə şəhidlik zirvəsinə yüksəlmiş Eldar Şirinovun doğum günüdür. Eldar Bağır oğlu Şirinov 12 iyul 2001-ci ildə Göyçay rayonunun Çərəkə kəndində anadan olub. O, ailənin ən kiçiyi, iki bacının bir qardaşı idi.
Şəhidimiz 2007-ci ildə Çərəkə kənd orta məktəbinin birinci sinfinə gedib. Məktəbi bitirdikdən sonra, Göyçay Dövlət İdarəetmə və Texnologiya Kollecinə qəbul olub.Təhsilini yarımçıq saxlayaraq həqiqi hərbi xidmətə yollanıb. Xidmətini Beyləqan rayonunun “N” saylı kəşfiyyat bölüyündə davam etdirən Eldar şərəflə Vətənə olan borcunu yerinə yetirib.
Eldar Şirinov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Oktyabrın 3-də Füzuli istiqamətində gedən döyüşlərdə qəhrəmancasına şəhid olub. Göyçay rayonun Çərəkə kəndində dəfn olunub.
Qeyd edək ki, Prezident İlham Əliyevin Sərəncamına əsasən Eldar Şirinov ölümündən sonra “Vətən uğrunda”, “İgidliyə görə” və “Füzulinin azad olunmasına görə” medalları ilə təltif olunub.