Azadsöz.az xəbər verir ki, 01 noyabr 2024-cü il tarixdə Birinci Qarabağ müharibəsində itkin düşmüş və şəxsiyyəti müəyyənləşdirilən şəhidlərdən biri olan Piriyev İsmət Medal oğlunun nəşi Göyçay rayon Çərəkə kənd Şəhidlər Xiyabanında dəfn edilib.
Şəhidin vida mərasimində Göyçay Rayon İcra Hakimiyyətinin başçısının müavinləri, hüquq-mühafizə orqanlarının rəhbərləri, idarə, müəssisə və təşkilatların kollektivləri, rayon ictimaiyyətinin nümayəndələri, şəhid ailələri, Vətən müharibəsi iştirakçıları və əlilləri iştirak ediblər.
Şəhid İsmət Piriyevin nəşi Göyçayda izdihamla qarşılanaraq, ailəsinin yaşadığı Çərəkə kəndinə gətirilib, cənazə namazı qılınıb və şəhidlərimizin ruhuna dualar oxunub.
Göyçay rayon Çərəkə kənd Şəhidlər Xiyabanında yaylım atəşi və hərbi orkestrın ifasında Azərbaycan Respublikasının Dövlət Himni səsləndirilib, məzarı üzərinə əklil və gül dəstələri düzülüb.
Sonra şəhidin tabutuna bükülmüş Azərbaycanın üçrəngli bayrağı qardaşına təqdim edilib.
Şəhid Piriyev İsmət Medal oğlu 08.01.1975-ci il tarixdə Göyçay rayonunun Çərəkə kəndində anadan olub. 29.04.1993-cu il tarixdə hərbi xidmətə çağırılıb, 01.01.1994-cü il tarixdə Füzuli rayonu istiqamətində gedən döyüşlərdə itkin düşüb.
