Azadsöz.az xəbər verir ki, 11 noyabr 2023-cü il tarixində Göyçay Rayon İcra Hakimiyyətinin təşəbbüsü ilə Göyçay Şəhər stadionda 15-ci “Nar Festivalı” keçirilib.
Rayon icra hakimiyyətinin təşkilatçılığı ilə keçirilən bayram tədbirində Göyçay Rayon İcra Hakimiyyətinin başçısı Natiq Ağayev, Dövlət Təhlükəsizlik Xidmətinin rəisinin müavini Şərafət Həsənov, Milli Məclisin deputatları Sabir Hacıyev, Məzahir Əfəndiyev, Afət Həsənova, Kənd Təsərrüfatı Nazirliyinin Aqrar İnnovasiya Mərkəzinin direktoru Anar Cəfərov, dövlət və hökümət nümayəndələri, xarici ölkələrin Azərbaycandakı əməkdaşları, yerli və əcnəbi iş adamları və minlərlə rayon sakini iştirak edib.
Əvvəlcə qonaqlar ümummilli lider Heydər Əliyevin abidəsini ziyarət edərək önünə gül-çiçək dəstələri düzüb, xatirəsini ehtiramla yad ediblər.
Daha sonra qonaqlar Göyçay Şəhidlər Xiyabanına gələrək ərazi bütövlüyümüzün təmin olunması uğrunda canından keçən şəhidlərimizin məzarları önünə tər qərənfillər düzüblər.
Sonra bayram tədbiri Göyçay Şəhər stadionda başlayıb.Qonaqlara yerli müəssisələrin istehsalı olan nar şirələri paylanıb.Göyçaylı qadınların ifasında səslənən folklor nümunələri, mahnı-rəqs qruplarının və rayonun yeniyetmə idmançıların çıxışları maraqla qarşılanıb.
Rayonun 25 kəndində narçılıqla məşğul olan insanların yetişdirdiyi məhsullardan hazırlanmış məhsulların sərgisinə baxış keçirilib. Qonaqlar aş, nardança, kətə, yuxa, nar şərab, nar şirəsi kimi təamların dadına baxıblar.
Festivalda ən böyük nar müsabiqəsinin və nar sıxmaq yarışlarının qalibləri mükafatlandırılıb.
Bayram tədbirində maraqlı anlar yaşanıb. 44 günlük Vətən müharibəsində iştirak edərək sağlamlığını itirən Göyçay rayon Məlikkənd kənd sakini Salahov Əfsun Tahir oğlu Mahmudova Lalə İsmixan qızı ilə festivalda nikaha daxil olub.Göyçay Rayon İcra Hakimiyyəti tərəfindən cütlüyə hədiyyə təqdim olunub.
Festivalın rəsmi hissəsindən sonra bayram tanınmış incəsənət ustalarının təqdim etdikləri konsert proqramı ilə davam etdirilib, atəşfəşanlıqla başa çatıb.
Qeyd edək ki, Nar bayramı sabahda davam edəcək.
Səbuhi Eltonlu
Gülşən Muradova
Zəka Nağıyev
