Azadsöz.az xəbər verir ki, 12 aprel 2023-cü il tarixində Göyçay Dövlət Aqrar İnkişaf Mərkəzinin inzibati binasında Kənd Təsərrüfatı Nazirliyinin, Ekologiya və təbii sərvətlər Nazirliyinin və Fövqəladə Hallar Nazirliyinin birgə təşkilatçılığı ilə ekoloji sabitliyin qorunması və ətraf mühitin mühafizəsi mövzusunda tədbir keçirilib.
Tədbirdə Dövlət Aqrar İnkişaf Mərkəzinin rəhbərliyi və kollektivi, Göyçay rayon İcra Hakimiyyətinin Başçının birinci müavini İkram Vəliyev, rayonun kənd inzibati ərazi dairələri üzrə bələdiyyə üzvləri, Göyçay Dövlət Aqrar İnkişaf Mərkəzinin rəhbəri Elçin İsmayılov və mərkəzin əməkdaşları, rayon ictimaiyyətinin nümayəndələri, fermerlər və kombaynçılar iştirak ediblər.
Tədbirdə çıxış edənlər Azərbaycanda ətraf mühitin mühafizəsi və ekoloji problemlərin daim diqqət mərkəzində olduğu diqqətə çatdırılıb. Prezident İlham Əliyevin rəhbərliyi ilə ölkəmizdə bütün sahələrdə olduğu kimi, ekoloji problemlərin həlli, ətraf mühitin mühafizəsi, ekoloji tarazlığın bərpa edilməsi istiqamətində də mühüm işlər görüldüyü vurğulanıb.Ekoloji cəhətdən dayanıqlı sosial-iqtisadi inkişafa, meşələrin bərpa edilməsi və artırılması istiqamətində dövlət proqramlarının uğurla icra olunduğu qeyd olunub.
Bununla yanaşı görüş iştirakçılarına yanğın təhlükəsizliyi normalarının və qaydalarının tələblərinə riayət olunmasının və əhaliyə yanğın təhlükəsizliyi tədbirlərinin öyrədilməsinin, eyni zamanda yanğın təhlükəsizliyi ilə bağlı aidiyyəti orqanların göstərişlərinin və digər qanuni tələblərinin yerinə yetirilməsinin vacibliyi qeyd edilib.Görüşdə fermerlərə ehtiyatsızlıqdan və yaxud məqsədyönlü şəkildə biçindən sonra taxıl sahələrinə od vurulmasının böyük fəsadlara səbəb olduğu qeyd edilib.
Belə ki, yanğınların nəinki əkinə yararlı torpaqlara, həmçinin meşə sahələrinə, əhalinin yaşadığı ərazilərə də ciddi zərər vurma ehtimalının olduğu bildirilib.Bu kimi halların qarşısının alınması üçün ekoloji sabitliyin qorunması və ətraf mühitin mühafizəsi istiqamətində fermerlərə əkin və taxıl biçimi zamanı sahələrə od vurulmaması, məhsuldarlığın artması və təhlükəsizliyin təmini məqsədilə müvafiq aqrotexniki tədbirlərin keçirilməsinin vacibliyi göstərilib. Görüşdə qarşıdan gələn taxıl biçininə hazırlıqla bağlı fermerlərlə görüşlərin mütamadi olaraq keçirilməsi diqqətə çatdırılıb.
