Azadsöz.az xəbər verir ki, 44 günlük Vətən müharibəsində ərazi bütövlüyünün təmin olunması uğrunda gedən döyüşlərdə şəhidlik zirvəsinə ucalan Göyçay rayonunun Birinci Ərəbcəbirli kənd sakini Maarif Rahim oğlu Həsənovun ailəsinin yaşadığı ev Göyçay rayon İcra Hakimiyyəti tərəfindən əsaslı şəkildə təmir olunub.
Təmir işləri şəhidimizin anası Nəzakət Həsənovanın mənzilinin yaxşılaşdırılması məqsədi ilə bu ilin oktyabrında rayon icra hakimiyyətinə etdiyi müraciəti əsasında aparılıb.
Aparılan əsaslı təmir əsasında şəhidimizin həyat və döyüş fəaliyyətini əks etdirən guşə otağı dar olduğundan genişləndirilib.Bununla yanaşı mənzilin digər iki otağının döşəmə və tavanı dəyişdirilib, divarlarına divar kağızı vurulub.
Şəhidin anası Nəzakət Həsənova evin əsaslı təmirində zəhməti olan Göyçay rayon İcra Hakimiyyətinə və hər kəsə ailəsi adından təşəkkürünü bildirib.
Bildirək ki, Göyçay rayonunda Vətən müharibəsi şəhidlərinin ailələrinə, əlillərə və iştirakçılara daim diqqət, qayğı ilə yanaşılır, rayon icra hakimiyyəti həmin ailələrin problemləri ilə mütəmadi maraqlanır, qaldırdıqları məsələlərin həlli ilə bağlı müvafiq tədbirlər həyata keçirir.
Qeyd edək ki, Maarif Rahim oğlu Həsənov 1999-cu il` noyabrın 19-da Göyçay rayonunda anadan olub. 27 sentyabr 2020-ci ildə başlayan Vətən müharibəsinə yollanıb. Ağdərə və Suqovuşan istiqamətində gedən döyüşlərdə iştirak edib.12 oktyabr 2020-ci ildə öz komandiri ilə şiddətli döyüşdən geri dönərkən gözlənilmədən 7 nəfər erməni əsgəri ilə qarşılaşan Maarif özünü itirmir və əlindəki qumbara ilə 4 ermənini məhv edir. Sağ qalan 3 ermənidən biri Maarifə atəş açır və o, şəhid olur. Maarifin komandiri isə qalan 3 ermənini öldürür, özü isə ağır yaralanır. Maarif Həsənov 17 noyabr 2020-ci ildə Göyçay şəhəri Şəhidlər Xiyabanında dəfn olunub.
Prezident İlham Əliyevin sərəncamına əsasən, Maarif Həsənov ölümündən sonra “Vətən uğrunda”, “Suqovuşanın azad olunmasına görə” və “Cəsur döyüşçü” medalları ilə təltif edilib.
Xatırladaq ki, Göyçayda küçələrdən birinə şəhid Maarif Həsənovun adı verilib.Bununla yanaşı adına xatirə bulağı tikilib.
