“Azadsöz.az” Göyçay informasiya agentliyinə istinadən xəbər verir ki, Azərbaycan Prezidenti İlham Əliyevin Sərəncamı ilə təsdiqlənən “Hemofiliya və talassemiyadan əziyyət çəkən uşaqlara qayğı” Dövlət Proqramının icrası çərçivəsində ənənəvi olaraq yayın son ayları ərəfəsində 02 sentyabr 2022-ci il tarixində “Qan ver, həyat xilas et!” şüarı altında növbəti humanist aksiya Göyçay rayon İcra Hakimiyyətinin, İcbari Tibbi Sığorta üzrə Dövlət Agentliyinin, Tibbi Ərazi Bölmələrini İdarəetmə Birliyinin (TƏBİB) və Göyçay Rayon Mərkəzi Xəstəxanasının birgə təşkilatçılığı ilə Göyçay Gənclər Evində keçirilib.
Keçirilən aksiyada RİH başçısı aparatının məsul şəxsləri, hüquq-mühafizə orqanlarının nümayəndələri, idarə, müəssisə və təşkilatların rəhbərləri, rayon ictimaiyyəti iştirak ediblər.
Milli Hematologiya və Transfuziologiya Mərkəzinin Qan Bankının tibb briqadasının hematoloqları tərəfindən hər bir donor tibbi müayinədən keçdikdən sonra, onlardan qan analizi götürülüb və aksiyaya qoşulması ilə bağlı rəy verilib.
Qeyd edək ki, götürülən qan nümunələri laboratoriyada müayinə edildikdən sonra hemofiliya, talassemiya və digər qan xəstəliklərindən əziyyət çəkən insanların müalicəsində istifadə olunacaq.
