Azadsöz.az xəbər saytının təsisçisi,baş redaktoru, jurnalist və yazar Səbuhi Eltonlunun “Necə oldu ki, oğru oldu”? adlı hekayəsini təqdim edirik:
“Necə oldu ki, oğru oldu”?
Samir universitetə hər gün avtobusla gəlib-gedirdi.Artıq o,həyatın bu təkrarına alışmışdı.Gündəlik istifadə etdiyi avtobusda nə qədər sıxlıq olsa da irəliyə keçib sürücüdən saxlamasını xahiş etmirdi.Bilirdi ki, “Gənclik” metrosunun yanındakı dayanacaqda saxlayacaq, seyrəklik olduğu üçün düşməyə məqam yaranacaq.Bəzən sıxlıq yaranan avtobusda görmədiyi dost-tanışla seyrəklik zamanı rast gəlirdi.Məcbur olurdu ki, öz gediş haqqı ilə yanaşı,onun da gediş haqqını versin.Çox vaxt üstündə artıq pul olmadığı üçün ya özünü görməməzliyə vururdu, ya da avtobus da sıxlıq yaranan an yarı yolda düşüb universitetə piyada gedirdi.Həmişə sıxlığına öyrəşdiyi avtobus Samirin bəxtindən həmin gün çox seyrək idi.Avtobusa minəndə oxuduğu universitetdə oxuyan dostu Arazla rastlaşdı.Başları söhbətə necə qarışmışdısa “N.Nərmanov” metrosuna çatdıqlarını unutmuşdular.Sürücü metronun yanındakı dayanacaqda saxlayıb aşağı düşdü.Samir üstündə artıq pul olmadığı üçün, Arazın o an telefonla danışmağından,sürücünün olmamağıdan və sərnişinlərin başlarının qarışıq olmasından istifadə edərək sürücünün pul yığılan yerinə yaxınlaşıb, 20 qəpik götürdü.Sonra da arxaya dönüb baxdı ki, onu görən olmadı.Bəlkə də görən var idi, amma bəxtindən heç kəs bir söz demədi.O, oğurluq etdiyini bilirdi, ancaq bunu etməli idi. “Gənclik” metrosunun yanındakı dayanacaqda öz pulunu, bir də götürdüyü, başqa sözlə desək, oğurladığı pulu verib, Arazla düşdü.Yol boyu öz-özünə düşündü axı, etdiyi hərəkət oğurluq deyil.Götürdüyü pulu yenidən yerinə qoydu.