Azadsöz.az xəbər verir ki, iyunun 19-da İkinci Qarabağ müharibəsində şəhid olan Bığır kənd sakini,Qüdrət Bəhruz oğlu Əzizovun ad günü məzarı önündə və evində, rayon İcra Hakimiyyəti başçısı, hüquq-mühafizə orqanlarının rəhbərləri, kənd sakinləri və şəhidin ailə üzvləri, ağsaqqallar və dindarlarla birlikdə qeyd olunub.
İlk öncə şəhidimizin əziz xatirəsi ehtiramla yad olunub, məzarı üzərinə gül dəstələri düzülüb.Daha sonra rayon rəhbəri şəhidin ailəsinə baş sağlığı verərək, Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlardan söz açıb. Rəşadətli ordumuzun, qəhrəman oğullarımızın şücaət göstərərək, həyatları bahasına torpaqlarımızı düşməndən azad etdiyini qeyd edib.
Mərasimdə çıxış edənlər 24 yaşı tamam olan şəhid Qüdrət Əzizovun keçdiyi qısa və mənalı həyat yolundan söz açıblar. Vətənimizin bütövlüyü uğrunda mübarizədə canlarından keçmiş şəhidlərin əziz xatirəsini daim uca tutmağı, vətən uğrunda mübarizənin vacibliyi, tarix yazan qəhrəman şəhidlərin and yerimizə, ziyarət məkanımıza çevriləcəklərini bildiriblər.
Görüşün sonunda şəhidin atası Bəhruz Əzizov bu gün şəhid oğlunun ad günündə göstərilən diqqət və qayğıya görə, prezident İlham Əliyevə, Birinci vitse-prezident Mehriban xanım Əliyevaya və rayon rəhbərliyinə öz təşəkkürünü bildirib.
Qeyd edək ki, Qüdrət Bəhruz oğlu Əzizov 19 iyun 1997-ci ildə Göyçayın Bığır kəndində anadan olub.Orta təhsilini kənd orta məktəbində alıb.2014-cü ildə hərbi xidmətə başlamış və manqa komandiri olub.Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan Vətən müharibəsində 29 sentyabrda könüllü olaraq orduya qoşulmuş, Cəbrayıl, Füzuli, Qubadlı, Xocavənd istiqamətində gedən döyüşlərdə şücaət göstərib. Noyabrın 9-da Şuşa uğrunda gedən döyüşlərdə şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin 15.12.2020-ci il tarixli Sərəncamına əsasən Qüdrət Əzizov ölümündən sonra “Vətən uğrunda” medalı ilə təltif edilib.