Azadsöz.az xəbər verir ki, bu gün Ramazan bayramı münasibətilə 44 gün davam edən Vətən müharibəsində qəhrəmancasına şəhid olmuş polkovnik-leytenant Vidadi Xəlilovun Nizami küçəsində və Bığır kəndində şəhid Qüdrət Əzizovun adına inşa edilmiş bulaqların açılışı olub.
Açılış mərasimində rayon İcra Hakimiyyətinin başçısı Mehdi Səlimzadə, Milli Məclisin deputatı Sabir Hacıyev, hüquq-mühafizə orqanlarının rəhbərləri, ictimaiyyət nümayəndələri və şəhidlərin ailə üzvləri iştirak ediblər.
Qeyd edək ki, polkovnik-leytenant Vidadi Xəlilov 44 günlük Vətən müharibəsində Cəbrayılın, Qubadlının və Laçının azadlığı uğrunda gedən döyüşlərdə iştirak edib.Noyabrın 1-də Laçın döyüşləri zamanı şəhidlik zirvəsinə ucalıb.Polkovnik-leytenantımız Göyçayda Şəhidlər Xiyabanında dəfn olunub.
Vidadi Xəlilov ölümündən sonra Prezident İlham Əliyevin sərəncamına əsasən, “Vətən uğrunda”, “Hərbi xidmətlərə görə”, “Cəbrayılın”, “Qubadlının” və “Laçının” azad olunmasına görə medalları ilə təltif edilib.
Xatırladaq ki, Qüdrət Əzizov Vətən müharibəsində Cəbrayıl, Füzuli, Qubadlı və Xocavənd istiqamətində gedən döyüşlərdə iştirak edib.Noyabrın 9-da Şuşa döyüşləri zamanı şəhid olub.
Qüdrət Əzizov ölümündən sonra Prezident İlham Əliyevin sərəncamına əsasən, “Vətən uğrunda” medalı ilə təltif edilib.
