Azadsöz.az xəbər verir ki, pedaqoq, dil-ədəbiyyat müəllimi Qorxmaz Bəyaliyevin təşkilatçılığı ilə Göyçay rayonunun Müskürlü kəndində Müskürlü kəndinin tarixi: “Keçmişimiz, bu günümüz və gələcəyimiz” mövzusunda tədbir keçirilib.
Tədbirdə pedaqoq, dil-ədəbiyyat müəllimi Qorxmaz Bəyaliyev, Müskürlü kənd tam orta məktəbin direktoru Cəmalə İsmayılova, məktəbin pedaqoji kollektivi, şagirdlər, şair Vadil Ümid, 44 günlük Vətən müharibəsində şəhid olan Təbriz Xancanovun babası Nazir Xancanov, din xadimi Yusif Aslanov, Manaf Əlmuradov, Elşən Bəyaliyev, ziyalılar və kənd sakinləri iştirak ediblər.
Tədbir torpaqlarımızın ərazi bütövlüyü uğrunda canlarını qurban vermiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Mərasimi giriş sözü ilə açan Qorxmaz Bəyaliyev bildirdi ki, Azərbaycan Respublikası Milli Məclisinin 1 sentyabr 2004-cü il tarixli, 727-IIQ saylı Qərarı ilə Göyçay rayonunun Müskürlü kəndi Yeniarx kənd inzibati ərazi dairəsi tərkibindən ayrılaraq, mərkəzi bu kənd olmaqla, Müskürlü kənd inzibati ərazi dairəsi yaradılmışdır.Yaşayış məntəqəsi Göyçay qəzasında yaşamış müskürlü tayfasının məskunlaşması nəticəsində yaranmışdır. Kənd Molla Qədim adı ilə da tanınır. Müskürlü etnonimi Azərbaycanın şimal-şərqində, Vəlvələçayla Samurçay arasındakı Müşkür düzünün adından yaranmışdır. Müskürlü Müşkür düzündə qədimdə yaşamış ellərin ümumi adı olmuşdur. Müşkür isə “qışlaq” mənasındadır.Bu ad haqqında ilk məlumat XIII əsrdə verilmişdir. Qəbələ Müskürlüdə ilk məscid Mustafa babanın oğlu İslam baba tikdirib. 1992-ci ildə Qəbələ Müskürlüdə yenidən yeni məscid tikilib. Hazırda kənddə rayon İcra Hakimiyyəti başçısının kənd inzibati ərazi dairəsi üzrə nümayəndəlik, bələdiyyə, 1 baxça, 1 klub, 1 poçt, 1 kitabxana, 1 həkim məntəqəsi, 1 kənd tam orta məktəb və 2 məscid fəaliyyət göstərir.
Daha sonra Nazir Xancanov, Vadil Ümid, din xadimi Yusif Aslanov, Manaf Əlmuradov, Elşən Bəyaliyev nitq söyləyərək keçirilən tədbirin əhəmiyyətini yüksək qiymətləndirərək əməyi keçən Qorxmaz Bəyaliyevə minnətdarlığını bildiriblər.Müskürlü kəndinin tarixinin qorunub saxlanmasında və gənc nəsilə ötürülməsində bu cür tədbirlərin keçirilməsinin mühüm olduğunu diqqətə çatdırıblar. Kəndin igid oğullarının tarixin müxtəlif dövrlərində əsl qəhrəmanlıq nümayiş etdirdiklərini vurğulayıblar.Torpaqlarımızın erməni işğalından azad edilməsi uğrunda gedən 44 günlük Vətən müharibəsində də Müskürlü kəndinin igidlərinin qəhrəmancasına vuruşduğunu qeyd ediblər.
Sonra məktəblilər kəndin tarixi vətənpərvərlik mövzusunda şeirlər səsləndiriblər.
Tədbirdən sonra səmimi dialoq çay süfrəsi arxasında davam edib.
Müskürlü kəndi haqqında ətraflı məlumatı linkə daxil olub öyrənə bilərsiniz.
Göyçay rayonu Müskürlü kəndi haqqında
Səbuhi Eltonlu
