Azadsöz.az xəbər verir ki, 6 noyabr 2024-cü il tarixində Göyçay rayon Elnur Seyidov adına Ulaşlı-Şıxlı kənd tam orta məktəbində 8 Noyabr Zəfər Gününə həsr olunmuş “Əbədi Zəfərim” adlı ümumməktəb tədbiri keçirildi.
Tədbirdə məktəbin direktoru Aynur Mahmudova başda olmaqla pedaqoji kollektiv, şagirdlər, rayon İcra Hakimiyyəti başçısının Potu kənd inzibati ərazi dairəsi üzrə nümayəndəsi Yusif Rəsulov, şəhid Vilayət Rüstəmovun övladı Eldəniz Rüstəmov, şəhid ailələri, qazilər, veteranlar və kənd sakinləri iştirak ediblər.
Tədbiri giriş sözü ilə açan məktəbin direktoru Aynur Mahmudova Zəfər Günü münasibətilə iştirakçıları təbrik edib.Bildirib ki, Azərbaycan xalqının güclü iradəsi, Müzəffər Ali Baş Komandan İlham Əliyevin dəmir yumruğu və yüksək şücaəti, ordumuzun, əsgər və zabitlərimizin igidliyi, xalqımızın birliyi bizə bu tarixi zəfəri yaşadıb.
Mərasimdə digər çıxış edənlər bildiriblər ki, Azərbaycanın Silahlı Qüvvələri ötən il sentyabrın 27-dən noyabrın 10-dək davam edən müharibədə Müzəffər Ali Baş Komandan İlham Əliyevin rəhbərliyi ilə bütün döyüş əməliyyatlarını yüksək səviyyədə həyata keçirməklə mənfur düşməni diz çökdürdü, şanlı Zəfər qazandı və tarixi ədaləti, ölkəmizin ərazi bütövlüyünü bərpa etdi. Ötən hər gün bizi Vətən müharibəsindən zaman etibarilə uzaqlaşdırsa da, hərbçilərimizin şücaəti, canı, qanı bahasına qazanılan bu qələbə hər bir azərbaycanlı üçün son dərəcə əziz və qiymətlidir. Biz düz üç onillik ərzində torpaqlarımızın işğaldan azad ediləcəyinin ümidi ilə yaşamışdıq və qələbə müjdəsini gözləmişdik. Arzularımız 44 günlük Vətən müharibəsində çin oldu və biz böyük Qələbənin sevincini yaşadıq.
Daha sonra məktəblilərin ifasında şeirlər səsləndirilib, ədəbi-bədii kompozisiya nümayiş etdirilib.
Sonda tədbir iştirakçıları əllərində şəhidlərimizin fotolarından ibarət plakatlarla və üçrəngli bayraqla Ulaşlı-Şıxlı kənd qəbirstanlığında uyuyan 44 günlük Vətən müharibəsində qanı ilə tarix yazaraq şəhidlik zirvəsinə ucalan İntiqam Bəxtiyar oğlu Şirəliyevin məzarına qədər yürüş edərək xalqın birliyinin daimi və sarsılmaz olduğunu, Vətənə sevgi, şəhidlərimizə ehtiramın əbədiliyini bir daha nümayiş etdiriblər.
Səbuhi Eltonlu
