Azadsöz.az xəbər verir ki, bu gün faşizm üzərində qələbənin 79-cu il dönümü ilə bağlı tədbir Göyçay rayonunun Müskürlü kəndində Böyük Vətən müharibəsində həlak olan həmyerlilərimizin xatirəsinə ucaldılmış abidənin önündə qeyd olunub.
Tədbirdə Göyçay rayon İcra Hakimiyyəti başçısının Müskürlü inzibati ərazi dairəsi üzrə nümayəndəsi Mahizər Əliyeva, kənd üzrə bələdiyyə sədri Sabir Qəhrəmanov, pedaqoq, dil-ədəbiyyat müəllimi Qorxmaz Bəyaliyev, Böyük Vətən Müharibəsi iştirakçıları, Qarabağ əlilləri və şəhid ailələri, ziyalılar, Müskürlü kənd tam orta məktəbin pedaqoji kollektivi, şagirdlər və kənd sakinləri iştirak ediblər.
Tədbir Azərbaycan Respublikasının Dövlət Himni səsləndirilməsi və torpaqlarımızın ərazi bütövlüyü uğrunda canlarını qurban vermiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Mərasimi giriş sözü ilə açan Qorxmaz Bəyaliyev əlamətdar gün münasibəti ilə veteranları və tədbir iştirakçılarını təbrik edərək, onlara ən xoş arzularını çatdırıb. Bildirib ki, 1939-cu il sentyabrın 1-də Faşist Almaniyası ildırımsürətli “Barbarossa” planı əsasında Polşanı işğal edib. Bununla da bəşəriyyət tarixinə ən qanlı müharibə kimi daxil olan İkinci Dünya müharibəsi başlayıb. 1941-ci il iyunun 22-də isə Hitler Almaniyası Azərbaycanın da daxil olduğu SSRİ-yə hücum etdiyini, müharibənin 1945-ci il mayın 9-da – Berlindəki Reyxstaq binası üzərindən faşizm bayrağının endirilməsi və SSRİ-nin bayrağının sancılması ilə başa çatıb. Q. Bəyaliyev çıxışında veteranlarımızın hər birinin bizim üçün çox əziz insan, əsil həyat məktəbi, canlı tarix olduğunu və İkinci Dünya müharibəsində şərəfli döyüş yolu keçmiş Azərbaycan övladlarının qəhrəmanlığının heç vaxt yaddaşlardan silinməyəcəyini qeyd edib.
Daha sonra tədbirdə Mahizər Əliyeva, 44 günlük Vətən müharibəsi zamanı torpaqlarımızın ərazi bütövlüyü uğurunda gedən döyüşlərdə qəhrəmancasına şəhid olan Təbriz Xancanovun babası Nazir Xancanov, atası Məhəmmədəli Xancanov, Müskürlü kənd tam orta məktəbin direktor müavini Məhbubə Kərimova, Fazil Xancanov, din xadimi Yusif Aslanov, şəhid Vilayət Rüstəmovun oğlu Eldəniz Rüstəmov çıxış edərək bildiriblər ki, Azərbaycan xalqı 9 May – Qələbə Gününü xüsusi bir sevinclə qeyd edir. Çünki xalqımız erməni qəsbkarları tərəfindən işğal olunmuş torpaqlarımızın azad edilməsinin də sevincini yaşayır.Prezident, Müzəffər Ali Baş Komandan İlham Əliyevin yenilməz qətiyyəti, rəşadətli ordumuzun hünəri nəticəsində haqq – ədalət qələbə çalmış, işğal altında olan torpaqlarımızın 30 illik həsrətinə son qoyulmuşdur.
Tədbirin sonunda məktəblilər vətənpərvərlik mövzusunda şeirlər səsləndiriblər.
Səbuhi Eltonlu
