Azadsöz.az xəbər verir ki, Göyçay rayonunda Xocalı soyqırımının 32- ci il dönümü ilə əlaqədar soyqırım qurbanlarının xatirəsi anılıb.
Anım mərasimində Rayon İcra Hakimiyyətinin başçısı Natiq Ağayev, RİH başçısı aparatının məsul şəxsləri, rayonun hüquq-mühafizə orqanlarının, idarə, müəssisə və təşkilatların rəhbərləri, Birinci Qarabağ, Vətən müharibəsi şəhidlərinin ailələri, müharibə iştirakçıları, Azadsöz.az xəbər saytının və AzadSözAZ TV-nın əməkdaşları və ictimaiyyət nümayəndələri iştirak ediblər.
Tədbir iştirakçıları Göyçay şəhər Şəhidlər Xiyabanında Xocalı faciəsi qurbanlarının əziz xatirəsinə ucaldılan “Xocalı Soyqırımı” abidə kompleksinin üzərinə gül dəstələri düzüb, faciə qurbanlarının xatirəsini ehtiramla yad ediblər.
Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Mərasimdə Əməkdar müəllimi Pərviz Yəhyalı, Xocalı sakini Mustafa Hümbətov və digər natiqlər çıxış edərək erməni millətçilərinin Azərbaycan xalqının başına gətirdikləri faciələrdən, Xocalı sakinlərinə qarşı törətdikləri soyqırımdan danışıblar. Bildiriblər ki, Xocalı soyqırımını törətməkdə ermənilərin əsas məqsədi xalqımızın mübarizə əzmini qırmaq olub. Natiqlər Xocalı həqiqətlərinin dünyaya tanıdılması, erməni terrorçularının həyata keçirdiyi insanlıq əleyhinə cinayətlərin dünya ictimaiyyətinə çatdırılmasının vacibliyini vurğulayıblar. Ötən ilin sentyabr ayının 19-da Azərbaycan Ordusunun Qarabağda keçirdiyi lokal xarakterli antiterror tədbirləri ilə Xocalı şəhərinin işğaldan azad edildiyini, bu tarixi ədalətsizliyə birdəfəlik son qoyulduğunu diqqətə çatdırıblar.
Səbuhi Eltonlu
Gülşən Muradova
Arif Heydərov
Zəka Nağıyev