Azadsöz.az xəbər verir ki, ötən gün Şirvanregion xəbər portalı, Xəbərlər İnformasiya agentliyi saytının, rayon ictimayi nəzarət komissiyasının üzvü Yusif Rəsul özünün facebook sosial hesabında 44 günlük Vətən müharibəsində qəhrəmanlıq göstərərək qəlpə yarası alan Göyçaylı qazi Həbibov Nəsib Asif oğlu ilə görüş zamanı onun 6 ay Xırdalanda müalicə almasını, işsiz olmasını gündəmə gətirib.Çox keçməyib ki, qazimizin işsizliklə bağlı müraciətinə reaksiya verilib.
Göyçay rayonundan olan, keçmiş Göyçay Gənclər mərkəzinin direktoru, Göyçay rayon icra hakimiyyətinin mətbuat xidmətinin rəhbəri, Göyçay informasiya agentliyi, Nartv in və “Göyçay” qəzetinin baş redaktoru Anar Nağıyevin köməkliyi ilə qazimiz hazırda rəhbərlik etdiyi Xırdalan informasiya agentliyində fotomüxbir vəzifəsinə təyin olunub.Anar Nağıyev tərəfindən N. Həbibova redaksiya vəsiqəsi, foto aparat, və bəzi texniki avadanlıqlar verilib.
Xatırladaq ki, Vətən müharibəsi qazisi Həbibov Nəsib Asif oğlu 2001-ci ildə Göyçay şəhərində anadan olub.Orta məktəbi bitirdikdən sonra 2020-ci il yanvarın 9-da həqiqi hərbi xidmətə yola düşüb. Xüsusi texniki bacarıqlarına görə ilk öncə baş atıcı, daha sonra isə rabitə və xüsusi avadanlıqların idarə olunması üzrə xidmətlər yerinə yetirib. Sentyabr ayının 27-dən başlayaraq işğal altında olan torpaqlarımızın tam olaraq azad olunması üçün gedən döyüşlərdə iştirak edib. 19 yaşlı əsgərimiz bir çox istiqamətlərdə vuruşub. Nəsiblə döyüşlərdə iştirak edən digər 15 əsgər şəhidlik zirvəsinə ucalıb. Lakin həmin igid əsgərlərin içərisində möcüzə nəticəsində yalnız Nəsib qəlpə yarası alaraq sağ qalıb. N.Həbibov deyir ki, hələ də sağ qalmasına inana bilmir. Oktyabrın 26-sı Laçın uğrunda gedən döyüşlər zamanı sağ qolundan çoxlu sayda qəlpə yarası alaraq ağır yaralanıb. Buna baxmayaraq əlavə qüvvə gələnə qədər döyüş mövqeyini tərk etməyib. 19 yaşlı qəhrəman qazimiz döyüşlər zamanı göstərdiyi şücaətə görə Ali Baş Komandan İlham Əliyevin müvafiq sərəncamına uyğun olaraq “Vətən uğrunda” medalı ilə təltif olunub.
Qeyd edək ki, Nəsib Həbibov “Xırdalan” qəzeti, Xirdalan.info.az saytının və Xırdalan Tv youtube kanalının əməkdaşı kimi fəaliyyət göstərəcək.
