Azadsöz.az xəbər verir ki, “Göyçay İnkişaf Mərkəzi” Gənclər İctimai Birliyi Gənclər Fondu və Dövlət Məşğulluq Agentliyinin dəstəyi ilə “Özünüməşğulluğumuz üçün ömür boyu öyrənək” adlı layihənin icrasına başlayıb.
Layihə çərçivəsində Göyçay, Ağdaş və Qəbələ rayonlarında seçim mərhələsinin görüşləri keçirilib. Habelə, onlayn qeydiyyatdan keçən gənclərin müraciətləri dəyərləndirilib.
Layihə çərçivəsində hədəf regionlardan seçilən 45 gəncə peşəkar təlimçilər tərəfindən “Peşəkarlar modulu” əsasında dərslər tədris olunacaq, şəxsi səriştələrinin artırılması və məşğulluq imkanlarının genişləndirilməsi üçün onlara uğurlu gənclərin təcrübəsi bölüşüləcək, həmçinin özünüməşğulluq imkanları və metodları ilə bağlı təlimlər keçiriləcək.
Qeyd edək ki, layihənin məqsədi gənc işaxtaranların özünüməşğulluq imkanlarının genişlənməsinə dəstək olmaq, habelə həmin gənclərin bilik və bacarıqlarını artırmaqdır.
