Azadsöz.az xəbər verir ki, Təhsil Nazirliyi tərəfindən həyata keçirilən Təhsildə inkişaf və innovasiyalar üzrə V qrant müsabiqəsinin nəticələri açıqlanıb.Müsabiqəyə “Ümumi təhsil müəssisələri” kateqoriyası üzrə 230, “Fərdi kateqoriya” üzrə 741 olmaqla, ümumilikdə 971 layihə təqdim edilib. Ekspert qrupunun qiymətləndirməsi əsasında “Ümumi təhsil müəssisələri” kateqoriyası üzrə 47, “Fərdi” kateqoriya üzrə 132 layihə olmaqla ümumilikdə ən yüksək bal toplayan 179 layihə qrant qazanıb.
Təhsildə inkişaf və innovasiyalar üzrə V qrant müsabiqəsi çərçivəsində qrant qazanan layihələrin siyahısı ilə keçid vasitəsi ilə (“Fərdi” kateqoriya, “Ümumi təhsil müəssisələri” kateqoriyası) tanış olmaq mümkündür.
Müsabiqə nəticələrindən narazı qalan şəxslər avqustun 16-sı saat 18:00-dək grants@edu.gov.az elektron poçt ünvanına ad-soyad, əlaqə nömrəsi, təqdim etdikləri layihənin adı, kateqoriyası və nominasiyasını göndərərək apellyasiya müraciəti edə bilərlər.
Qeyd edək ki, bu gün 15:00-da Təhsildə inkişaf və innovasiyalar üzrə V qrant müsabiqəsinin nəticələrinə həsr olunan vebinar keçiriləcək. Vebinar Təhsil Nazirliyinin rəsmi feysbuk səhifəsi üzərindən yayımlanacaq.
