Azadsöz.az xəbər verir ki, 44 günlük Vətən müharibəsində qəhrəmanlıq göstərib, şəhidlik zirvəsinə ucalan Əsgərov İbrahim Məzahir oğlunun ailəsi çətin vəziyyətdə yaşayır.Şəhidin ailəsini acınacaqlı vəziyyətə salan rayonun icra başçısı Asif Ağayevdir.
Belə ki, şəhidimizin anası Elmira Cəfərova yaşadıqları Kolxoz binasının qarşısında olan 2 sot boş torpaq sahəsində şəxsi vəsaitləri hesabına ev tikmək istəyib.Bunun üçün rayon icra hakimiyyətinin başçısı Asif Ağayevə müraciət etsə də müsbət cavab ala bilməyib. Rayonun icra başçısı bildirib ki, həmin torpaq onlara məxsus deyil Kənd Təsərrüfatı Nazirliyinin balansındadır.
Xatırladaq ki, Əsgərovlar ailəsinin yaşadıqları mənzil Sovet hakimiyyəti dövründə tikilən Kolxoza aid olan anbar binasındadır. Binanın hər an uçma təhlükəsi var.
Qeyd edək ki, hələ uşaq yaşlarında atasını itirən İbrahim Əsgərov anasının himayəsində böyüyüb.Həmçinin ailənin tək övladı olub. Müddətdən artıq hərbi qulluqçu kimi Azərbaycan ordusunda xidmət edib. İ. Əsgərov 25 yaşında Xocavənd rayonunda şəhid olub.
Bildirək ki, Azadsöz.az qarşı tərəfin fikirini işıqlandırmağa hazırdır.
