Azadsöz.az xəbər verir ki, Göyçay rayon icra hakimiyyətinin tapşırıq və göstərişinə əsasən, Göyçay Şəhər Təsərrüfatı Birliyinin Yaşıllaşdırma Sahəsi tərəfindən rayonun prospekt və küçələrinə dekorativ güllərin əkilməsi və yaşıllıqların salınması davam etdirilsədə, rayonumuzun bəzi məsuliyyətsiz sakinləri tərəfindən yaşıllıqlar məhv edilir.
Dəfələrlə media və sosial şəbəkələr vasitəsilə rayonun yaşıllığına xələl gətirən bu cür vətəndaşlarımızla bağlı çağırışlar etməyimizə baxmayaraq bu gün gecə saatlarında Heydər Əliyev prospektinin yolboyu piyadaların hərəkəti üçün nəzərdə tutulmuş səkilərin kənarlarına əkilən 1490 ədəd Eldar şamının və küknar ağacının 10 ədədi oğurlanıb.
Qeyd edək ki, bu cür analoji hadisə bir müddət bundan əvvəldə baş vermişdir. Özünü qoçaq hesab edən bəzi sakinlərimiz tərəfindən qeyd olunan prospektdə əkilən ağaclardan 24 ədədi oğurlanıb.Bununla yanaşı vətəndaşların saxladıqları iri və xırda buynuzlu heyvanların ağaclar əkilən əraziyə daxil olması nəticəsində 14 ədəd ağac məhv olub.
Artıq məsələ ilə bağlı həmin şəxslərə qarşı müvafiq ölçü götürülməsi üçün əraziyə Göyçay rayon polis şöbəsinin əməkdaşları cəlb olunub və tapılması istiqamətində işlər görülür.
Rayonda əkilən müxtəlif növ ağaclara qənim kəsilən həmin şəxslərə bildirmək istəyirik ki, ekologiyanı qorumaq üçün hər birimiz ətrafımızdan və öz evimizdən başlamalıyıq.Unutmayın ki, sizin gördüyünüz bu iş sizin üçün adi gələ bilər amma, rayon üçün heç də ürək açan hərəkət deyil.
Xatırladaq ki, Göyçay Rayon İcra Hakimiyyəti yanında Şəhər Təsərrüfatı Birliyinin Yaşıllaşdırma Sahəsi tərəfindən rayonun prospekt və küçələrinə bu günə kimi ümumilikdə 1609 ədəd Eldar şamı və küknar ağacı əkilib.
Ümid edirik ki, bu videosüjetdən sonra bəzi məsuliyyətsiz vətəndaşlarımız bu dırnaqarası qəhrəmanlıqlarına son qoyacaqlar.
Səbuhi Eltonlu
Gülşən Muradova
Zəka Nağıyev
Arif Heydərov
