Səfərin əsas məqsədi Azərbaycan Respublikasının Ümummilli Lideri Heydər Əliyevin 100-cü ildönümündə və həmçinin Türkiyə Respublikasının quruluşunun 100-cü ilində qardaş Türkiyənin tarixi bölgələrini şəhid övladlarına tanıtmaq və xalqlarımız arasındakı əlaqələri daha da genişləndirməkdən ibarətdir.

Səfər çərçivəsində şəhid ailələri Nevşehir şəhərinin valisi Ali Fidan bəylə görüşüblər. Səmimi mühitdə keçən görüş zamanı Ali Fidan Azərbaycanın ərazi bütövlüyü uğrunda canlarından keçmiş bütün şəhidlərimizi dərin ehtiramla yad edib və onların ailə üzvlərinə cansağlığı, övladlarına bol-bol uğurlar arzulayıb. Həmçinin səfər zamanı şəhid ailələri Türkiyənin şəhid ailələri dərnəkləri ilə də görüşlərdə iştirak ediblər. Bu görüşlər zamanı hər iki ölkənin şəhid ailələrinə dəstək göstərən təşkilatları arasında olan əlaqələrin və əməkdaşlığın daha da möhkəmlənməsinin əhəmiyyəti vurğulanıb.

Nevşehirdə səfərdə olan şəhid ailə üzvləri bölgənin tarixi və turistik guşələrini də ziyarət etmək şansı əldə ediblər. Onlar Kapadokyada Göreme Açıq Hava Muzeyini, Nevşehir Qalasını, Derinkuyu yeraltı şəhərini və s. digər tarixi və turistik məkanları ziyarət edərək onlar barədə məlumat əldə ediblər.

Xatırladaq ki, Türkiyə Respublikasının Nevşehir bölgəsinə səfər edən  bir qrup şəhid ailəsindən 44 günlük Vətən müharibəsində qanı ilə tarix yazaraq şəhidlik zirvəsinə ucalan Qubadlı fatehi polkovnik-leytenant Vidadi Xəlilovun  həyat yoldaşı Nərmin Xəlilova və qızı Zəhra  Xəlilova da  iştirak edib.

Qeyd edək ki, Vidadi Xəlilov ölümündən sonra Prezident İlham Əliyevin Sərəncamı ilə “Vətən uğrunda”, “Cəbrayılın azad olunmasına görə”, “Qubadlının azad olunmasına görə”, “Laçının azad olunmasına görə”, “Hərbi xidmətlərə görə”, “Azərbaycan Bayrağı” medalları ilə təltif olunub.