Azadsöz.az xəbər verir ki, torpaqlarımızın ərazi bütövlüyü uğurunda gedən döyüşlərdə qəhrəmancasına şəhid olan “Qubadlı fatehi” polkovnik-leytenant Vidadi Xəlilovun üçüncü ildönümü ilə əlaqədar anım mərasimi Göyçay şəhər Şəhidlər Xiyabanında şəhidin məzarı önündə qeyd olundu.
Anım mərasimində rayon İcra Hakimiyyətinin başçısı Natiq Ağayev, RİH başçısı aparatının məsul şəxsləri, hüquq-mühafizə orqanlarının, rayonda fəaliyyət göstərən idarə, müəssisə və təşkilatların rəhbərləri, YAP Göyçay rayon təşkilatının sədri Sahib Şükürov, Müdafiə Nazirliyi “N” saylı hərbi hissəsinin əməkdaşları, şəhidimizin döyüş yoldaşları, rayon ictimaiyyətinin nümayəndələri, Azadsöz.az xəbər saytının və AzadSözAz televiziyasının kollektivi, şəhid ailələri və şəhidin ailə üzvləri iştirak ediblər.
Şəhidin məzarı önünə toplaşan mərasim iştirakçıları xatirəsini ehtiramla yad ediblər, önünə gül dəstələri düzüblər.
Tədbirdə çıxış edənlər şəhidimizin ailəsinə dərin hüznlə başsağlığı verib, Allahdan rəhmət və səbr diləyiblər. Vidadi Xəlilovun qısa və mənalı ömür yolundan , dövlət tərəfindən polkovnik-leytenanta verilən təltiflərdən, ailəsinə göstərilən diqqət və qayğıdan danışıblar. Qeyd edilib ki, Ali Baş Komandan İlham Əliyevin rəhbərliyi ilə Azərbaycanın müzəffər ordusu Ermənistanın 30 il ərzində qurduğu istehkamları 44 günə darmadağın etdi və məğlub olduğunu etiraf edən düşmən kapitulyasiya aktına imza atmağa məcbur edildi. Bu, Azərbaycan hərb tarixinin ən parlaq və şanlı səhifəsi idi.
44 günlük Vətən müharibəsinin Prezident, Müzəffər Ali Baş Komandan İlham Əliyevin rəhbərliyi sayəsində tarixi Qələbə ilə başa çatdığını, bu Qələbənin Vidadi Xəlilov kimi zabitlərimizin, əsgərlərimizin qanı bahasına qazanıldığını vurğulayıblar.Ordumuzun gücü, birliyimiz və həmrəyliyimiz sayəsində əldə olunan tarixi Qələbədə Azərbaycanın hansı mərhələlərdən keçdiyini bildiriblər. Şəhidlik zirvəsinə ucalanların xatirəsini yaşatmaq, onları gəncliyə nümunə göstərmək hər kəsin vətəndaşlıq borcu olduğunu diqqətə çatdırıblar.
Daha sonra şəhidimizin anası Əminə Məmmədova çıxış edərək şəhid övladı ilə bağlı öz təəssüratlarını bölüşüb.Şəhid ailələrinə göstərilən diqqət və qayğıya görə Prezident İlham Əliyevə, Birinci vitse-prezident Mehriban xanım Əliyevaya və rayon rəhbərliyinə öz minnətdarlıqlarını bildirib.
Tədbirdə məktəblilər vətənpərvərlik mövzusunda şeirlər səsləndiriblər.
Sonda şəhidimizin adına ehsan süfrəsi verilib.
Xatırladaq ki, polkovnik-leytenant Vidadi Xəlilov 2020-ci il sentyabrın 27-də başlayan Vətən müharibəsində iştirak edərək, Cəbrayılın,Qubadlının və Laçının azadlığı uğrunda gedən döyüşlərdə qəhrəmanlıq göstərib. 31 oktyabr 2020-ci ildə Laçın istiqamətində gedən döyüşlərdə qəhrəmancasına şəhid olub.Göyçay Şəhidlər Xiyabanında dəfn olunub.
Vidadi Xəlilov Azərbaycan Respublikası Prezidentinin sərəncamı ilə “Azərbaycan Bayrağı” ordeni, “Vətən uğrunda”, “Cəbrayılın azad olunmasına görə”, “Qubadlının azad olunmasına görə”, “Laçının azad olunmasına görə” və “Hərbi xidmətlərə görə” medalları ilə təltif edilmişdir.
Səbuhi Eltonlu
Gülşən Muradova
Zəka Nağıyev
