Azadsöz.az xəbər verir ki, Vətən müharibəsində şəhid olan Əzim Fikrət oğlu Həsənovun ailəsi Mingəçevirdə “QRES” deyilən ərazidə dəmir vaqonda yaşayır. Facebook istifadəçisi Maya Quliyeva ailənin yaşadığı evi feysbuk hesabında paylaşıb.Jurnalistin sözlərinə görə, Ağdam rayonundan məcburi köçkün olan ailə 1999-cu ildən etibarən, həmin ərazidə quraşdırılmış vaqonda, çox dözülməz şəraitdə yaşayır.
Xatırladaq ki, Ağdamın Xıdırlı kəndindən məcburi köçkün düşən Şəhid Əzim Həsənov 2004-2015-ci illərdə “QRES”-dəki 19 saylı məktəbdə oxuyub, məktəbi əla qiymətlərlə başa vuraraq, Azərbaycan Dillər Universitetinin (ADU) ingilis dili müəllimi ixtisasına qəbul olub.2019-cu ildə ADU-nun bakalavr pilləsini başa vurduqdan sonra, oktyabr ayında həqiqi hərbi xidmətə yollanıb.Hərbi xidmətinin başa çatmasına az müddət qalmasına baxmayaraq, başlanan İkinci Qarabağ müharibəsində Füzuli-Cəbrayıl istiqamətlərində döyüşdə olub.Füzulinin Aşağı Seyidəhmədli kəndi uğrunda gedən döyüşlərdə şücaət göstərərək, oktyabrın 8-də şəhidlik zirvəsinə ucalıb.Şəhidimiz 22 gündən sonra oktyabr 30-da Mingəçevirdə, Şəhidlər Xiyabanında dəfn edilib.
Qeyd edək ki, Əzim Fikrət oğlu Həsənov ölümündən sonra Azərbaycan Respublikasının Prezidenti İlham Əliyevin sərəncamı ilə “Vətən uğrunda” və “Füzulinin azad olunmasına görə” medalları ilə təltif olunub.
Qarşı tərəfin fikirini işıqlandırmağa hazırıq.
